بایرام گوروشو
بایرام گوروشو
گول چرشنبه سوولوب، خبرچین چرشنبه ده، کیچیک چیلله نین یامان عومرونون قوتولماغیندان خبر گئتیرمیشدی، نئجه کی کنده چرچی گلنده اوشاقلارسئوینه ـ سئوینه ننهلرینین شلتهسیندهن یاپشیب، هی چکیب دئیرلر، بیزهده، آینویون آل. ننه اورهیی دی ها، حساب ائیله نه قدر محبتلی اولار، اوشاقی بیر شئی ایستییه، مگر اولار آلمایا و اونون کیچیک و دئیرلی اورهیین سئویندیرمهیه.
خبرچین چرشنبه ده اوز گلیشایلن کیچیک و بویوک، قیز و اوغلان، هامنی سئویندیریردی، قضادهن او گون کنده چرچی گلمیشدی، ننهم اول بیر سوپورگه آلیب، منی ائوه یوللایب، دئدی تئز قاییت سنه ده سئودییین وسایللری آلیم، ننهم منی دالیدان سسلهییب دئدی: قونشوموزادا اوردان خبر وئر، چرچی قردش گئتمهمیش، گئل لازم اولان وسایللریوی آل.
آخی بایرامین گوزل قایدالاریندان بیریده بوکی تازا پالتار آلیب، بوجورلوغونان اوزوموزو تزه پالتارلارلان گئینیب، تزه ایلده، تزهلنمیش اورهکلری بیر بیرینه بوندان داها یاخینلاتماغا کوله چرشنبهنی گودهریک. تا آز ـ ماز قالان چیرکین لیکلری قیرب یئره توکهک و آخیر چرشنبه گونو صفالی و داغین سینه سینن گوز یاشی تک آخان چشمه لرین سویوندان، آتیل، ماتیل دئیب و همان سودان گئتیریب، یویونماغیلان، آخیر جلانی دا اوز وجودومازا وئریب، تزه ایلین گوروشونه سهمانلاشاریق. هئچ او گونلر یادیمدان چیخماز بایرام قاباغی، حاجی لئیلک لرده کئچن ایلدن قالان یووا یوردلارینا، چور ـ چوب ییغیب، تزهلیک وئرردیلر، اولاردا دا ائوین کیشیسی، اوزونه گونره بیر خاص غرور ایلن باشلایب قلیان نین چکیردی، ائوین خانیمی-دا ترمیزلییه باخیردی. سیغیرچین لار اوز نغمه لریلن سئوینمکلرین، تزه ایلین گلمهییندن بیلندیریردیلر، باشیمیز ائله شیرین قاتیشمیشدیکی، هئچ بیلمهدیک چرشنبهلر هاواق گلدی سوووشدو. و بیز تزه چیچک وروب و آچیلان گول کیمی، تمیزلهنیب، قوناقلاریمیزی گودوردوک. حیف اولا بهار گوللری سولوب توکولن کیمی، محبتده اورک لردن سولقونلویوبدو. بیری دئییر دای قدیم دئییل کی، ایندی هر شئی ایسته سن، هر زامان، هریئرده آلماق اولار، هر دیقه گلیب گوروشمک وار، دای نه لوزومو واردی، بایرام گونو ائو ائشیگی اوتووروب و اوزاخدان، یاخیندان دوروب کنده گله سن، بایرامی دا تیلفونولان تبریک دئمک دای گورهر، تازا بوجوره سی خرج و مخاریج ده آزالیر، آمما او اوزون دئدیک، بو اوزون ده دئیهک، بایرام گونو بیر ائوه یغیشیب، آتا آنا و کیچیک باجی و قارداش یانین دا، بایرام یئمیش لرین پایلاشماغین آیری جور دادی وار. ایه بو گوزللیک و شیرین لییی ایستهییرسیز بو بایرام آتا آنازین یانینا گلیب، اونو بیر داها چوخ شنلندیرین. نییه کی بوتون آنالارین گوزلری بایرام گؤنو قوربتده اولان اوشاقلارینین یولون دا قالار.
حسن بلندی کرویق / اسفند 89